إهداء إلى كل أبناء ترابك الغالى..إلى كل من يحب مصر....لجل عيونك يا حرة..
آه يا بلد...
يوم ما يصرخ فيكى الوليد...
يقولوا إنه اتولد...
أول حاجة بنعملها فى حياتنا...
صراخ..و بكا...
من هنا بتبدأ حكاية...
لمشوار طويل...
بنمشيه ..و نكتبه...
نحضره ببسمة...
أو كلمة و همسة...
مرسومة جوه عيون...
لسه رغم كل همومها...
عارفة تضحك...
و كمان تحلم..
و أنا عن نفسى بستغربلها...
*******
آه يا بلد...
لساكى قادرة تضحكى...
و تفرحى قلوب كتير...زعلانة..
لساكى قادرة تبتسمى...
و الدموع فى العيون متشالة...
لساكى بترسمى أمل لبكرة...
فى طريق هتمشيه...
لساكى بتحبى الحياة...
رغم إن معظم اللى بيحبوكى...
باعوا و ما اشتروش...
*******
آه يا بلد...
ياللى كل ما تحصل حاجة فيكى...
يقولوا البلد..
و انتى زى م انتى ...
لا أرضك بطلت تجيب خير...
و لا نيلك بطل يجيب خير...
بس العيب فينا احنا...
و بنجيب العيب فى البلد....
******
أول شئ عملناه يوم م اتولدنا...
إن إننا صرخنا...
قلنا احنا هنا...
لينا حق فى الحياة...
إننا بشر...
من حقنا نحلم و نقول حقنا...
و نتكلم...
******
و أما كبرنا...
و كبر معانا حلمنا...
فقنا و صحينا...
و السكات بقى هو صراخنا...
و لو اتكلمت...معروف هتروح فين!!!
اتربينا لما كبرنا...ع السكات...
بس اللى فات مات...
أيوة مات..!!
******
كنا لحد امتى هنسكت...؟!!
جوانا حاجات كتير بتغلى...
يوم ورا يوم...
زهقنا من سكاتنا ....
و اتولدنا من جديد....
و علا صوتنا...
و قولنا يعزيمة و إرادة من حديد...
اتولدنا من جديد....
******
اتولدنا من جديد...
لجل عيونك يا حرة...
اتولدنا من جديد...
و هنبنيكى...
مهما كانوا حسادك...
مهما كانوا ...
غيرانين...
متآمرين...
متقسمين...
هنبنيكى...
احنا بيكى...و احنا ليكى...
دمنا الغالى ليكى...
ايد واحدة...شعب واحد...
بلدنا واحدة ...
أم الدنيا...
مصر...
****************************************************************
فضلا : إذا أعجبتك مدونتى فرجاء أن تتابع المدونة بالضغط على
follow with Google connect.
و المشاركة بالنشر لأصدقاءك عن طريق الضغط على
Like
No comments:
Post a Comment