فى الواقع أصبح مجرد استقلال أى وسيلة مواصلات أسلوبا جيدا لمعرفة رأى الشارع المصرى فيما يحدث الآن فى البلد...
بالأمس كان يومى حافلا فى العمل...و رحلة العودة للمنزل كانت على غير العادة مليئة بالمفاجآت...فى البداية توجهت بالميكروباص (السيرفيس) لموقف الميكروباصات الذى منه سوف أسافر إلى منزلى...
و هنا بدأت المغامرات...الموقف بجميع محطاته لا يوجد به ميكروباص واحد..و كيف ذلك؟؟ سنعرف فيما بعد...و فجأة سمعنا صراخا و لننظر على الناحية الأخرى بعد الموقف ببضعة أمتار لنجد أن أحد أسطح المنازل (تعريشات من الخشب) قد اندلعت فيه النيران ...و بالطبع مع حرارة الجو ازدادت سرعة انتشار النيران و كان الخوف كله من امتداد الحريق للمنازل المجاورة...
و من هول الموقف...لم أرى ما كنت قد اعتدت أن أراه من هرولة الناس لكى تنقذ ما يمكن إنقاذه أو لإطفاء الحريق...طبعا محدش يقوللى ننتظر المطافئ لأن ده معناه "تكون البلد كلها ولعت" على رأى أحد المارة...
المهم البعض اتجه ليساعد الأهالى هناك لتطفئة الحريق و المعظم وقف يشاهد و يتفرج و الأدهى يصور بالموبايلات منظر الحريق...و هنا تبادر لذهنى سؤالا " هو الناس خلاص معدش عندها شهامة و معدش عندها مروءة تروح تساعد و تطفى الحريقة دى؟؟!!"
الحمد لله بفضل الجيران و الأهالى تمت السيطرة على الحريق..اللى بصراحة معرفش كان بسبب ايه؟ بس طبعا كانت هناك سحابة دخان كثيفة...
نرجع لموضوع المواصلات اللى مفيش و لا عربية ميكروباص موجودة فى الموقف و مش كده و بس لا ده كل السواقين اللى بيوصلوا الموقف ...امتنعوا عن تحميل عربياتهم و قالوا مش هنمشى على الطريق تانى...
طب يا جماعة ايه سبب أزمة المواصلات دى...؟؟ و لك أن تتخيل كميات البشر التى أصبحت متراكمة على طول امتداد الموقف..
اتضح ان مجموعة من السواقين فى موقف أحد القرى اللى موجودة على الطريق قاطعين الطريق...بخشب مليان مسامير و بيحدفوا الميكروباصات اللى تعدى بالطوب و بيوقفوا العربيات و يكسروا الزجاج...و أى عربية ميكروباص هتعدى من عليهم و تنزل ركاب مش هيحصللها طيب...!!
طيب ايه مطالب السواقين دول؟؟!! يا للمفاجأة ....عايزين يزودوا الأجرة ربع جنيه...ربع جنيه!!! ربع جنيه عشانه تقطع طريق و تروع مواطنين و تكسر عربيات..
الحمد لله أخيرا عربيات وافقت تحمل و تركب الناس...بس مش هتمشى من الطريق المعتاد هتمشى من طريق تانى عشان تبعد عن منطقة القرية اللى قاطعين الطريق..و الطريق البديل ده طريق طويل و مش مرصوف و بيمر بين قرى و غيطان ..و مفيهوش و لا عمود نور واحد يعنى لا يمكن العربيات تمشى فيه بالليل...!!
المهم الحمد لله ركبت فى ميكروباص كان نصيب السواق بتاعه انه انضرب من اللى قاطعين الطريق و هو جاى الموقف..ده غير ان زجاج العربية اللى قدام اتشرخ شرخ كبير و ربنا سترها على كده..
طبعا لسان حال معظم اللى فى العربية.." أدى يا سيدى الثورة و اللى جابتهولنا ..و لسه يا ما هنشوف!!"
و السؤال فعلا ...لحد امتى هنفضل نشوف كل الفوضى دى فى البلد...؟؟
و مانقولش العيب فى اللى بيحكمونا...العيب فى اللى بيستغل الأوضاع دى و يصعب الأمور على الناس أكثر و أكثر..
دمتم فى حفظ الله ........
**********************************************************
فضلا إذا أعجبتك مدونتى يمكنك متابعتها بالضغط على
Follow with Google connect
و المشاركة مع الأصدقاء عن طريق Like or tweet
و متابعة بعض المدونات الهامة فى رأيى من قائمة المدونات التى على اليمين
No comments:
Post a Comment